Ang Department of Education (DepEd) naglatid sa pag-abli sa School Year (SY) 2022-2023 karong Agusto 2022. Ning panahona, ang mga administrador sa tunghaan, mga magtutudlo ug mga tinun-an nagkapakapa sa pagpangandam sa hingpit nga face-to-face (F2F) classes human sa kapin sa duha ka tuig nga nahimong virtual o online tungod sa pandemiya sa Covid-19.Apan daghang hagit ang sektor sa edukasyon. Managlahi ang sitwasyon sa matag dapit o rehiyon apan, komon ang lagda nga ipatuman bahin sa minimum health standards. Daan nang nagkuwang sa classrooms. Nisamot nga mokunhod sa halos katunga ang masulod sa lawak tungod sa social distancing ug uban pa.Bisan dili sentro nga tunghaan, mapugos na lang seguro sa paghimo sa morning ug afternoon sessions. Unsa na kaha ang mga central school nga daan nang nagpunsisok ang tinun-an? Dinhi sa Kabisay-an ug ubang rehiyon nga naigo sa super bagyong Odette sa Disyembre 16, 2022, daghang tunghaan ang naguba.Sa dakbayan sa Sugbo, ang Local School Board (LSB) nagkanayon nga napuno sa daghang hangyo gikan sa mga tagdumala sa mga tunghaan sa pag-ayo sa atop sa ilang building nga nawalis ni Odette. Dugang pa, gikinahanglan usab ang bag-ong mga materyal sa edukasyon labina sa mga libro ug mga kahimanan sa mga magtutudlo.Samtang, magsugod na ang klase apan wala hingpit nga gideklarar nga natapos ang pandemiya sa Covid-19. Sumala sa ahensiya sa panglawas, namatikda nga dunay pagsaka sa kaso. Hinuon, layo pa sa sa pag-isa og balik sa taas nga alert level. Ang dengue fever naghulga usab ning panahon sa ting-uwan, labi na sa mga bata.Kining tanan, dakong hagit usab kini sa bag-ong kalihim sa (DepEd) nga si Bise Presidente Sara Duterte. Maayong kalamboan ang pagpahigayon sa F2F classes human napamatud-an nga mas epektibo kini pagpaambit sa mga magtutudlo sa ilang leksiyon nga pisikal nga giatubang ang mga bata. Kontrolado ang ilang atensiyon, Gawas pa, dunay sikolohikal nga epekto sa mga bata nga dunay kaduwa nga ilang kaedad.